അതിർത്തിയിലെ അമ്മ

ഇത്‌ അമ്മ ....
അതിർത്തി വളച്ചൊതുക്കിയ ഒരു തുണ്ട്‌ ഭൂമിയല്ലിവ-
ളകിട്ടിൽ നുരയിടും വർഗ്ഗവിദ്ദ്വേഷത്തിൻ ഗോവുമല്ല
പരം പൊരുളിൻ കുരുക്കഴിയ്ക്കും വേദമല്ല
സ്ത്രീയല്ല..... കാമമല്ലിവളൊരു വെറും അമ്മ,
കണ്ണീരിൽ കുതിർന്നവൾ!

നിണമുരുക്കിയേകിയ മുലപ്പാൽ,
ദൂരെ-മഞ്ഞിന്റെയിരുളിൽ, മക്കൾ- രുദിരമായൊഴുക്കവേ
പേറ്റുനോവിന്റെ വ്യർത്ഥതയിലൂറും വിലാപം
മക്കളിരുപക്ഷത്തുമുല്ലൊരു കുന്തിയാണിവൾ!!

വന്ധ്യമാം ശൃംഗങ്ങളെ വേൾക്കനായരചന്മാർ
വിന്യസ്സിപ്പിച്ച 'ജിഹാദി'ൽ പൊലിയുന്നോരാണ്മക്കൾ...
മരണമില്ലാത്തവളിവളും ഇവളുടെ-
വറ്റാത്ത കണ്ണീരും..., ദൂരേ-
പഞ്ചനക്ഷത്രങ്ങളിൽ ചഷകങ്ങ-
ളുച്ചകോടികളാടി തിമിർക്കട്ടെ....